Blogging shuru karne se pehle ye 5 baate zaroor jaan le
Doston, aaj se karib 7 saal pehle maine blogging ki duniya me apna pehla kadam rakha tha, tab maine apni life ka pehla domain buy kia tha. Jab bhi koi blogging shuru karta hai, to galtiyan karna, unse sikhna, ye sab to chalta hi rehta hai. Lekin jab maine blogging shuru ki to main koi bhi galti nahi karna chahta tha. Main chahta tha ki mera blog shuru se hi ekdum perfect ho. Yahi wajah thi ki domain kharidne se lekar agle 6 mahine tak maine apne blog ki design and iske content par hi kaam kiya. Main har din copyblogger, seomoz jaise famous blogs padhta tha taki inse jyada se jyada jankari hasil kar pau.
Lekin itni mehnat aur ek bahut acchi theme hone ke bawjud jab maine apna blog launch kiya to results mere anuman ke mukable me bahut hi kum the. Shuru me to main is baat ki wajah se bahut nirash ho gaya, lekin kuch waqt baad maine apne fellow bloggers se is bare me discussions karna shuru kiya. Isi baat chit ke dauran mujhe kuch aisi baate pata chali jo har naye blogger ko zaroor pata honi chahiye.
Ab aap bhi soch rahe honge ki ye kaunsi baate thi aur ye blogging par kaise asar dalti hain? To doston, chaliye inke baare me jaante hain:
1. Apna blog kisi specific topic par banaye aur usi par tike rahe:
Jab maine blogging ki shuruaat ki thi, to main bahut jyada excited tha aur apne blog par wah sab kuch share karna chahta tha jiski mujhe thodi bhi jankari thi. Lekin dheere dheere main ye samajh gaya ki agar hum ek hi waqt par bahut sari chizon par dhyan dene lagte hain to sach to ye hai ki hum kisi ek par bhi dhang se kaam nahi kar paate. Mere saath bhi aisa hi kuch hua. Main ek hi baar me sab kuch karna chahta tha isliye koi ek bhi kaam acche se nahi kar paya aur jald hi apna focus khone laga.
Aur ye jo galti hai, yeh bahut hi common hai. Chahe wo blogging ho ya aur koi field, ek sath sab kuch karna aksar chize kharab kar deta hai. Behtar hai, ek-ek kar ke chize uthaye aur unhe poora kare. Mujhe bhi kuch samay baad ye baat samajh aayi ki agar mujhe safal hona hai to pehle mujhe kisi bhi ek topic me mahir hona hoga. Han, jab mere blog ki ek pehchan ban jaye, uske baad me zaroor doosri chizo par try kar sakta hoon, lekin shuruaati daur me hi ye sab karna ek sahi decision nahi hai.
ReeHindiTrick.in me guest post kaise kare
Ye baat samajh aate hi sabse pehle maine ek aisa topic chuna, jiski mujhe acchi jankari bhi hai aur jisme mera interest bhi hai. Fir maine us topic se related high quality valuable content apne blog par dalna shuru kiya. Aur aap manenge nahi, 15 din me hi mere blog ke results me badlav aaya aur wo sudharne lage.
2. Bina kisi investment ke aapko results nahi milenge:
Main is baat se acchi tarah parichit hoon ki career ki shuruaat me paise ki tangi aksar raha karti hai aur hum paise invest nahi kar paate. Iske alawa internet par kai aise articles hote hain, jinke titles kuch aise hote hain, “Kaise maine bina 1$ lagaye blogging se 400$ kamaye”, lekin doston ye bilkul hi galat hai. Baki sabhi businesses ki tarah, blogging me bhi kuch aisi jagah hoti hain, jahan aapko paise invest karne hi padte hain, jaise ki
Domain kharidne ke liye
Theme kharidne ke liye
Hosting ke liye
Content writing ke liye (Agar aap khud nahi kar rahe hain)
Aur han, ek accha laptop to chahiye hi
Internet se online paisa kaise kamaye
To doston, agar aap bhi blogging shuru kar rahe hain, to in basic steps ke liye pehle se hi kuch paise alag se nikal kar rakhen.
3. SEO ko bilkul na bhule:
Maana aapka blog bahut sundar hai aur aapne is par bahut hi accha content dala hai jo sachmuch logo ki madad kar sakta hai. Lekin agar ye aapke readers tak pahunch hi nahi pa raha hai to ye kisi bhi kaam ka nahi hai. Isliye doston, apna blog set-up karte hai sabse pehle HYPERLINK "https://yoast.com/wordpress/plugins/seo/" Yoast SEO plugin install karen. Ise install karne me aapko bas kuch minutes hi lagenge aur ye aapke blog ke seo ke sare kaam sambhal lega. Jab plugin install ho jaye, to Youtube par SEO basics ke tutorials dekh len ki SEO kaise kam karta hai, aap SEO me backlinks kaise bana sakte hain, aadi. Ye sabhi chize aapko long term me bahut faida dengi.
4. Social media ka bhi faida uthaye:
Jab maine blogging shuru ki to sabse badi galti mujhse ye hui ki social media par apne blog ke liye maine professional profiles nahi maintain kiye. Doston, agar aap blogging journey ka ek hissa hain, to aapke social media profiles aapki online identity ka ek bahut bada hissa hain. Yahan par kuch bhi ulta-sidha share karna, aapke blog ki image ko bahu kharab kar sakta hai.
Jaise hi mujhe social media ki importance ka pata chala, maine iska faida uthana shuru kiya. Choonki mera blog travelling se related tha, apni trips ke dauran liye gaye photos ka maine HYPERLINK "https://www.canva.com/en_in/create/photo-collages/" photo collage create kar ke social media par share karna shuru kiya. Doston, ispar mujhe bahut hi accha response mila. Isliye aap bhi apne blog ki marketing strategy me social media ko shamil karna na bhule.
5. Jis tarah hatheli par sarso nahi jamti, blogging bhi raato-rat aapko safal nahi bana degi:
Chahe baat blog indexing ki ho, ya aapke articles ki rankings ki, har chiz me time lagta hai. Agar aap har ghante apna analytics account check kar rahe hain to aapko nirasha hi milegi. Blogging me patience ki bahut hi zaroorat hoti hai.
Government portal se online paisa kaise kamaye
Han, kuch log aise bhi hote hain jinhe raato-rat safalta mil jaati hai lekin wah sirf ek sanyog ki baat hoti hai. Agar aap long term ke liye top par rehna chahte hain to aapko lagatar mehnat karni hogi.
To doston, blogging ki journey ek raat me khatm nahi ho sakti. Lekin han, agar aapne in sab baaton ka dhyan rakha aur lagatar mehnat ki, to safalta jyada door nahi hai.
Author bio:
Thanks
